Peyi a soti pase yon move lane 2017. Gouvènman an te pran yon seri mezi malouk ki te mete abse sou klou mas popilè yo ki deja ap kokobe anba eslpwatasyon yon ti ponyen gran don ak oligachi a. Pati RASIN KAN PÈP La swete tout moun epi espesyalman mas popilè yo yon bon lane batay pou 2018. Men, nou pa dwe kontante nou sèlman fete jou premye janvye a kòm premye jou lane a. Se moman pou nou sonje kokenn chenn mesaj ewo nou yo ki montre tout planèt tè a chimen pou kase chenn lesklavay, rasis ak kolonyalis; yon jan pou tout moun viv lib.
Ane 2018 la ap fè Karl Marx de san lane depi li te fèt, Karl Marx sa a ki lofri limanite yon liv li rele "Kapital la". Liv sa se youn nan pi gwo zouti pou ede mas popilè yo, ki fòme ak pi fò moun sou tè a, kaba lesplwatasyon boujwa ki se yon ti minorite. Pati nou an ta remen liv sa a klere batay nou pou nou ka rive mete kanpe yon Ayiti ki nouri tout pitit li yo.
Pati nou an, pou rive mare ak objektif sa a, ta renmen ane 2018 la bay fòs revolisyonè yo kouraj ak vizyon pou nou ini nou. Se sèl fòs ki kapab konstwi yon Ayiti sosyalis epi ki kapab konplete nan fason tan jodi a revolisyon 1804 la nan liy revolisyon oktòb 1917 ak tout lòt pèp sou latè ki pa janm sispann batay kont sistèm sansi kapitalis la.
Marc-Arthur Fils- Aimé Secrétaire Général / Sekretè jeneral
Camille Chalmers Porte-Parole/Pòt pawòl